Шрифт

Акафисты Господу Богу

Акафист о упокоении усопших

Акафист о упокоении усопших
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1

Непостижи́мым про́мыслом ко бла́гу ве́чному мир уготовля́яй, челове́ком времена́ и о́браз кончи́ны определи́вый, оста́ви, Го́споди, от ве́ка уме́ршим вся согреше́ния их, приими́ я во оби́тели све́та и ра́дования, объя́тия О́тчи отве́рсти им потщи́ся и услы́ши ны, па́мять их соверша́ющия и пою́щия: Го́споди, Любы́ Неизрече́нная, помяни́ усо́пшия рабы́ Твоя́.

И́кос 1

Ада́ма па́дшаго и весь род челове́ческий от ве́чныя поги́бели спаса́яй, посла́л еси́, Бла́же, в мир Сы́на Твоего́, Кресто́м бо и Воскресе́нием Его́ возсия́ и нам Живо́т Ве́чнующий. На безме́рное Твое́ милосе́рдие упова́юще, ча́ем нетле́ннаго Ца́рствия Сла́вы Твоея́, усо́пшим дарова́ти того́ про́сим и мо́лим Ти ся. Возвесели́, Го́споди, ду́ши жите́йскими бу́ри истомле́нныя, да ско́рби и воздыха́ния земны́я забве́нию предадя́т. Услы́ши я, Го́споди, на ло́не Твое́м, я́ко же мать ча́да своя́, и реки́ им: проща́ются вам греси́ ва́ша. Приими́ я, Го́споди, в блаже́нное и ти́хое приста́нище Твое́ да возра́дуются о боже́ственней сла́ве Твое́й.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 2

Озаре́нием Всевы́шняго просвеща́ем, преподо́бный Мака́рий глас от че́репа язы́ческа услы́ша: “Егда́ мо́литеся о стра́ждущих во а́де, отра́да быва́ет язы́чником”. О, ди́вныя си́лы моли́тв христиа́нских и́миже преиспо́дняя озаря́ется! Неве́рныя ку́пно и ве́рныя утеше́ние прие́млют, егда́ о всем ми́ре вопие́м: Аллилу́иа.

И́кос 2

Рече́ не́когда Исаа́к Сирия́нин: “Се́рдце ми́лующее о лю́дех и ско́тех и о тва́ри всей моли́твы сле́зныя ежеча́сно прино́сит, да́бы сохрани́лися и очи́стилися”. Та́кожде и мы все дерзнове́нно всем от ве́ка уме́ршим у Го́спода по́мощи прося́ще, взыва́ем. Ниспосли́ нам. Го́споди, дар моли́твы пламене́ющей о уме́рших. Помяни́, Го́споди, вся запове́давшия нам, недосто́йным, моли́тися о них, и изжени́ забве́нныя и́ми грехи́. Помяни́, Го́споди, вся без моли́твы погребе́нныя, приими́, Го́споди, в селе́ния Твоя́, вся от ско́рби и́ли ра́дости сме́ртию напра́сной сконча́вшияся.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 3

Пови́нны е́смы в бе́дствии ми́ра, в страда́нии безслове́сныя тва́ри, в боле́знех и му́ках младе́нцев непоро́чных, грехопаде́нием бо люде́й блаже́нство и ле́пота всея́ тва́ри разру́шься. О Велича́йший от страда́льцев неви́нных, Христе́ Бо́же наш! Ты Еди́н еси́ отпусти́ти всем мо́жеши. Отпусти́ же всем и вся, ми́ру первозда́нное благоде́нствие пода́ждь, ме́ртвии и живи́и да обря́щут, взы́вая: Аллилу́иа.

И́кос 3

Све́те ти́хий. Искупи́телю всея́ вселе́нныя, любо́вию мир весь объе́мляй: се слы́шится со креста́ во́пль Твой о вразе́х Твои́х: “О́тче, отпусти́ им!” И́менем всепроще́ния Твоего́ моли́тися Отцу́ Небе́сному об упокое́нии ве́чнем Твои́х и на́ших враг дерза́ем. Прости́, Го́споди, кровь непови́нную проли́вшия, жите́йский путь наш скорбьми́ усея́вшия, благоде́нствие свое́ слеза́ми бли́жних свои́х устроя́ющия. Не осуди́. Го́споди, гоня́щия ны клевето́ю и зло́бою, ми́лостию возда́ждь, и́хже оби́дехом и́ли оскорби́хом по неве́дению, и да бу́дет свя́та моли́тва на́ша о них та́инством примире́ния.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 4

Спаси́, Го́споди, в тя́жких муче́ниях сконча́вшияся, убие́нныя, живы́ми погребе́нныя, земле́ю засы́панныя, волна́ми и огне́м поглоще́нныя, зверьми́ расте́рзанныя, от гла́да, мра́за, бу́ри и́ли паде́ния с высоты́ уме́ршия и ра́дость Твою́ ве́чную пода́ждь им за ско́рбь кончи́ны. Да благословя́т страда́ний своих вре́мя, я́ко искупле́ния день, воспева́я: Аллилуи́а.

И́кос 4

Всем, и́же пое́млеми суть моги́лой во све́тлой ю́ности, и́же на земли́ терно́вый вене́ц страда́ний прия́ша, и́же ра́дости земны́я не узре́ша, щедро́тами Твоея́ безконе́чныя любве́ возда́ждь. Го́споди. Под тя́жким бре́менем трудо́в уме́ршим воздая́ние пода́ждь. Приими́, Го́споди, в черто́зи рая́ о́троцы и де́вы и сподо́би я ликовствова́ния на ве́чери Сы́на Твоего́. Ути́ши, Го́споди, ско́рбь роди́телей о ча́дех уме́рших. Упоко́й, Го́споди, вся ро́да и се́мени не иму́́щия, о ни́хже не́сть кому мо́литву вознести́ Тебе́, Созда́телю, да исче́знут греси́ их от блиста́ния всепроще́ния Твоего́.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 5

Я́ко после́днее ко вразумле́нию и покая́нию зна́мение смерть дарова́л еси́, Го́споди. При гро́зном блиста́нии ея́ суета́ земна́я обнажа́ется, стра́сти плотски́я и страда́ния утиха́ют, непокори́вый ра́зум смиря́ется. Пра́вда ве́чная отверза́ется, отягче́нныя же грехми́ и безбо́жницы на сме́ртном о́дре бытие́ Твое́ ве́чное испове́дуют и к милосе́рдию Твоему взыва́ют: Аллилу́иа.

И́кос 5

О́тче утеше́ния вся́ческаго, со́лнцем озаря́еши, плода́ми услажда́еши, ле́потою ми́ра дру́зи и врази́ Твоя́ весели́ши. Ве́руем бо, я́ко и за гро́бом милосе́рдие Твое́, да́же все́ми отве́рженныя гре́шницы ми́лующее, не истощаева́ется. Скорби́м об ожесточе́нных и беззако́нных хули́телях Святы́ни Твоея́. Бу́ди, Го́споди, над ни́ми спаса́ющая блага́я воля Твоя́. Оста́ви, Го́споди, без покая́ния сконча́вшимся, спаси́ в омраче́нии ума са́ми себе́ погуби́вшия, да уга́снет пла́мень грехо́вности их в мо́ре благода́ти Твоея́.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 6

Стра́шен есть мрак души́, от Бо́га удале́нной, со́вести терза́ния, скре́жет зу́бный, о́гнь неугаси́мый и че́рвь неумира́ющий. Трепе́щу таковы́я у́части и, я́коже о саме́м себе́, молю́ся о во аде стра́ждущих. Да сни́дет на ня росо́ю прохлажде́ния на́ша песнь: Аллилу́иа.

И́кос 6

Возсия́л свет Тво́й, Христе́ Бо́же наш, на седя́щия во тьме и се́ни сме́ртней и во а́де су́щия, Тебе́ взыва́ти не мо́гущия. В преиспо́дняя земли́ снизше́д, изведи́, Го́споди, во отра́ду грехми́ с Тобо́ю разлуче́нныя, но не отре́кшияся от Тебе ча́да Твоя́, стра́ждут бо лю́те, поми́луй я. Согреши́ша бо на Не́бо и пред Тобо́ю, безме́рно тя́жки грехи́ их, ми́лость же Твоя́ безме́рна есть. Посети́ го́рькую нищету́ душ от Тебе́ отдале́нных, поми́луй, Го́споди, и́стину по неве́дению гна́вшия, бу́ди им любо́вь Твоя́ не огне́м паля́щим, но ра́йскою прохла́дою.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 7

По́мощь пода́ти десни́цею Свое́ю тща́шеся усо́пшим ра́бом Свои́м, яви́ся им. Го́споди, в виде́ниих таи́нственных, яснови́дно, на моли́тву их вдохновля́я, да помина́я отше́дшия, блага́я дела́ и по́двизи за ня творя́т, взывая: Аллилу́иа.

И́кос 7

Це́рковь Христо́ва Вселе́нская непреста́нно ежеча́сно моли́твы за почи́вшия по всей земли возно́сит, грехи́ бо ми́ра Пречи́стою Кро́вию Боже́ственнаго венца́ смыва́ются, от сме́рти к животу́ и от земли́ к Небеси́ ду́ши усо́пших си́лою моли́тв за ня пред олтари́ Бо́жии. Бу́ди, Го́споди, хода́тайство Це́ркви уме́ршим ле́ствицею к Небеси́. Поми́луй я. Го́споди, предста́тельством Пресвяты́я Богоро́дицы и всех святы́х. Оста́ви им согреше́ния, ве́рных Твои́х ра́ди, день и ночь к Тебе вопию́щих. Незло́бивых ра́ди младе́нцев по́милуй, Го́споди, роди́телей их, и ма́терей слеза́ми искупи́ согреше́ния чад их. За моли́твы безви́нных страда́лец, за кровь му́ченик пощади́ и поми́луй гре́шницы. Приими́, Го́споди, моли́твы на́ша и ми́лостыни, я́ко воспомина́ние доброде́телей их.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 8

Мир весь о́бщая моги́ла свяще́нная е́сть, на вся́ком бо ме́сте пра́х оте́ц и бра́тий на́ших. Еди́ный неизме́нно возлюби́вый ны, Христе́ Бо́же наш, прости́ вся, е́же от нача́ла и до ны́не уме́ршия, да воспою́т любо́вию безме́рною: Аллилу́иа.

И́кос 8

Гряде́т бы́ти день, я́ко пещь горя́щая, день ве́лий и стра́шный Суда́ после́дняго, та́йны челове́ческия откры́ются, кни́ги со́вестныя разгну́тся… “Примири́теся с Бо́гом!” – вопие́т Апо́стол Па́вел, – примири́теся пре́жде того стра́шнаго дне”. Помози́ нам. Го́споди, слеза́ми живы́х недостаю́щее уме́рших воспо́лнити. Да бу́дет им, Го́споди, звук трубы́ А́нгельской спасе́ния благове́стием и в час Суда́ Твоего ра́достнаго поми́лования их сподо́би. Уве́нчай, Го́споди, сла́вою за Тя пострада́вшия и покры́й бла́гостию Твое́ю прегреше́ния не́мощных. Го́споди, вся по и́мени ведый, помяни́ во и́ночестем чи́не спаса́вшияся, помяни́ благослове́нныя па́стыри со ча́да их.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 9

Благослови́те скоротеку́щее вре́мя. Ка́ждый бо час, мгнове́ние ка́ждое к ве́чности приближа́ет. Но́вая скорбь, седина́ но́вая суть ве́стницы ми́ра гряду́щаго, свиде́телие тле́нности земны́я, я́ко вся мимотече́т. Возвеща́ют, яко Ца́рство Ве́чное прибли́жися, иде́же не́сть ни сле́з, ни воздыха́ния, но отра́дная пе́ния: Аллилу́иа.

И́кос 9

Я́ко дре́во по вре́мени ли́ствий свои́х лиша́ется, та́ко и дни́е на́ши по коли́ких ле́тех оскудева́ют. Увяда́ет и ю́ности пра́зднество, свети́льник ра́дования угаса́ет, бли́зится ста́рости отчужде́ние. Дру́зи и сро́дницы умира́ют. Где вы, ю́ныя лику́ющия? Безмо́лвны гро́бы их, но ду́ши их в десни́це Твое́й. Мы́слим взо́ры их из ми́ра невеще́ственнаго. Го́споди, Ты еси́ Со́лнце пресве́тлое, озари́ и согре́й усо́пших селе́ния. Да пре́йдет наве́ки го́рькаго разлуче́ния вре́мя. Сподо́би ны ра́достнаго свида́ния на Небесе́́х. Сотвори́, Го́споди, да все еди́но бу́дем с Тобо́ю. Возврати́, Го́споди, отше́дшим де́тства чистоту́ и юности благоду́шие и пра́здником Па́схи да бу́дет им Живо́т Ве́чный.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 10

Пролива́я ти́хия сле́зы на моги́лах сро́дников на́ших, мо́лимся с наде́ждою и с упова́нием взыва́ем: скажи́ нам, Го́споди, я́ко оста́вил еси́ грехи́ их! Да́ждь о сем открове́ние таи́нственное ду́ху на́шему, да воспева́ем: Аллилу́иа.

И́кос 10

Весь путь преше́дшия жи́зни на́шея ви́жу озира́яся, коли́ко мно́жество люде́й, от пе́рваго дне и до ны́не отше́дшия, и мно́зи их блага́я ми соде́явшия. Любо́вию свое́ю до́лжная сим воздава́я, вопию́ Ти. Сподо́би, Го́споди, сла́вы Небе́сная роди́тели моя́ и бли́жняя моя́, над ло́жем мои́м младе́нческим бо́дрствовавшия, возрасти́вшия и воспита́вшия мя. Просла́ви, Го́споди, пред А́нгелы святы́ми, всех благовествова́вших ми сло́во спасе́ния, добру́, пра́вде, святы́м приме́ром жи́зни своея́ учи́вшия мя. Услади́, Го́споди, тех, и́же во дни ско́рби моея́, ма́нною сокрове́нною послужи́ша ми. Вся доброде́тели и благоде́тели вознагради́ и спаси́.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 11

Где ты, сме́рти жа́ло, где же и мрак и страх твой пре́жде быва́ющий? Отны́не ты жела́нная, неразлу́чно с Бо́гом сочета́еши. Поко́ю вели́кий суббо́тства таи́нственнаго. Жела́ние и́мам умре́ти и со Христо́м бы́ти, взывает Апо́стол. Те́мже и мы, взира́я на смерть, я́ко на стезю́ к Ве́чней Жи́зни, воззове́м: Аллилу́иа.

И́кос 11

Воскре́снут ме́ртвии и воста́нут су́щии во гро́бех и возвеселя́тся живу́щии на земли́, я́ко воста́нут телеса́ духо́вныя, све́тло просла́вленныя, нетле́нныя. Ко́сти сухи́я, слы́шите сло́во Госпо́дне: “Се Аз введу в вас дух живота́ и дам на вас жи́лы и возведу́ на вас плоть и простру́ по вам ко́жу”. Возста́ньте из дре́вле проше́дшаго вре́мене, иску́пленнии кро́вию Сы́на Бо́жия, оживле́ни сме́ртию Его, возсия́ бо на ны свет Воскресе́ния. Отве́рзи им, Го́споди, ны́не всю бе́здну соверше́нств Твои́х. Ты сиял еси́ им све́том со́лнца и луны́, да у́зрят они и славу лучеза́рных ли́ков А́нгельских. Ты услажда́л еси я великоле́пием восто́ка и за́пада свети́л небе́сных, да у́зрят же они́ и свет невече́рний Божества́ Твоего́.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 12

Плоть и кровь Ца́рствия Бо́жия не насле́дят, доко́ле во пло́ти живе́м, отлуче́ннии от Христа́. А́ще же и у́мрем, но оживе́м для Ве́чности. Подоба́ет бо тле́нному телу на́шему в нетле́ние обле́кшись и ме́ртвенному сему́ бессме́ртием просия́ти, да́бы во све́те невече́рняго дне воспе́ти: Аллилу́иа.

И́кос 12

Ча́ем сре́тения со Го́сподем, ча́ем я́сной зари́ воскресе́ния, ча́ем пробужде́ния из гро́бов сро́дников на́ших и зна́емых и оживле́ния в благогове́йнейшей ле́поте жи́зни уме́рших. И гряду́щее преображе́ние всея́ тва́ри торжеству́ем и Возсозда́телю на́шему вопие́м: Го́споди, к торжеству́ ра́дости и доброте́ мир созда́вый, нас к свя́тости из глубины́ грехо́вныя возста́вивый, да́ждь уме́ршим ца́рствовати посреде́ бытия́ но́ваго, да возсия́ют я́ко свети́ла на Небеси́ в день сла́вы их. Да бу́дет им А́гнец Боже́ственный све́том невече́рним. Да́ждь, Го́споди, и нам с ни́ми Па́сху нетле́ния пра́здновати. Соедини́ уме́ршия и живы́я в несконча́емей ра́дости.

Го́споди, Любы́ Неизрече́нная, помяни́ усо́пшия рабы́ Твоя́.

Конда́к 13

О, Премилосе́рдный О́тче Безнача́льный, всем хотя́й спасти́ся. Сы́на к поги́бшим ниспосла́вый и Ду́ха Животворя́щаго излива́яй! Поми́луй, прости́ и спаси́ родны́я и бли́зкия нам усо́пшия и всех от ве́ка сконча́вшихся и предста́тельством их, посети́ нас, да вме́сте с ни́ми вопие́м Тебе́, Спаси́телю Бо́гу, побе́дную песнь: Аллилу́иа.

(Этот кондак читается трижды, затем икос 1-й и кондак 1-й.)

Молитва о усопших

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый! Сам, Го́споди, упоко́й ду́ши усо́пших раб Твои́х: святе́йших патриа́рхов, преосвяще́нных митрополи́тов, архиепи́скопов и епи́скопов, во свяще́нническом, церко́вном и мона́шеском чи́не Тебе́ послужи́вших; созда́телей свята́го хра́ма сего́, правосла́вных прао́тец, оте́ц, бра́тий и се́стер, зде и повсю́ду лежа́щих; вожде́й и во́инов за ве́ру и оте́чество живо́т свой положи́вших, ве́рных, убие́нных в междоусо́бной бра́ни, утону́вших, сгоре́вших, на мра́зе заме́рзших, расте́рзанных зверьми́, без покая́ния внеза́пно сконча́вшихся и не успе́вших примири́ться с Це́рковью и со свои́ми враги́; в изступле́нии ума самоубие́нных, тех, о ко́их запове́дали и проси́ли ны моли́тися, о ко́их не́сть кому моли́тися и ве́рных, погребе́ния христиа́нскаго лише́нных (и́мя рек) в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, содея́нное и́ми сло́вом и́ли де́лом и́ли помышле́нием, я́ко благи́й Человеколю́бец Бог прости́, я́ко несть челове́к, и́же жив бу́дет и не согреши́т. Ты бо еси еди́н кроме́ греха́, пра́вда Твоя́ – пра́вда во ве́ки, и сло́во Твое́ – и́стина.

Я́ко Ты еси́ Воскресе́ние, и Живо́т и Поко́й усо́пших раб Твои́х (и́мя рек), Христе́ Бо́же наш, и Тебе́ сла́ву возсыла́ем со безнача́льным Твои́м Отце́м, и Пресвяты́м, и Благи́м, и Животворя́щим Твоим Ду́хом, ны́не и при́сно и во ве́ки ве́ков. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, спаси́ и помилуй мя, гре́шнаго, яко Благ и Человеколюбец.

Акафист о упокоении усопших